Main » 2012 » მაისი » 27 » აქციას 110 ათასი ადამიანი ესწრებოდა - IPN-მა მონაცემები google map-ის სპეციალური პროგრამით დათვალა
8:08 PM
აქციას 110 ათასი ადამიანი ესწრებოდა - IPN-მა მონაცემები google map-ის სპეციალური პროგრამით დათვალა
"ქართული ოცნების" აქციაზე მონაწილეთა რაოდენობა 110 ათასს შეადგენდა. "ინტერპრესნიუსმა" მომიტინგეების რაოდენობა, საერთაშორისო მედიაში აღიარებული სტანდარტების მიხედვით დაითვალა. კერძოდ, google map-ის სპეციალური პროგრამის მეშვეობით გაიზომა მოედნის სიგრძე და სიგანე. მიღებულ ფართობს გამოაკლდა წმინდა გიორგის მონუმენტის მიერ დაკავებული ტერიტორიის ფართობი. მოედნის იმ ნაწილმა, სადაც მომიტინგეებს დგომა შეეძლოთ, პუშკინის სკვერის ჩათვლით, 15 ათასამდე კვადრატული მეტრი შეადგინა. იგივე მონაცემებია "ვიკიპედიაშიც". ჩრდილიან ადგილებში სიმჭიდროვე ძალიან მაღალი იყო, მზიანში კი ნაკლები. მსგავს შემთხვევებში სტანდარტის მიხედვით ერთ კვადრატულ მეტრზე საშუალოდ 4 ადამიანს ითვლიან. შესაბამისად, თავისუფლების მოედანზე დღის 15.00 სააათზე, მომიტინგეთა შესაძლო რაოდენობა 60 ათასს აღწევდა. გარდა ამისა, თავისუფლების მოედნიდან მეტრო "თავისუფლების მოედნამდე" გამზირის სიგრძე 160 მეტრია, სიგანე საშუალოდ 30 მეტრი. 4800 კვადრატულ მეტრ ფართობზე დაახლოებით 20 000 ადამიანი იდგა. მეტრო თავისუფლების მოედნიდან" კინო "რუსთაველამდე" 8800 კვადრატულ მეტრ ფართობზე ხალხი უფრო მეჩხერად იყო და, შესაბამისად, კვადრატული მეტრის კოეფიციენტად ორი კაცი იქნა აღებული: 17 000-ზე მეტი მოქალაქე. სასტუმრო "თბილისი მარიოტის" მიმდებარე ტერიტორიაზე დამონტაჟებულ რამდენიმე ეკრანთან და მათ შორის გაფანტული იყო დაახლოებით 5-6 ათასი ადამიანი. თავისუფლების მოედნის მიმდებარე ტერიტორია დაკავებული იყო პუშკინის ქუჩის მხრიდანაც, ხელოვნების მუზეუმამდე. 2200 კვადრატულ მეტრ ფართობზე დაახლოებით 7 ათასამდე კაცი იდგა. შესაბამისად, საერთო ჯამში, 27 მაისის აქციაზე 15.30 საათისთვის მომიტინგეთა რაოდენობა, დაახლოებით, 110 ათასს შეადგენდა.